فیضان محمد

فیضانِ محمد

ہر شخص کی گردن پہ ہے احسانِ محمد

ہر سمت نظر آتا ہے فیضانِ محمد

ممکن نہیں مجھ سے ہو بیان شانِ محمد

جبریلِ امیں رہتے تھے دربانِ محمد

ہر دور میں باطل نے بہت زور لگایا لیکن نہ بُجھی مشعلِ قرآنِ محمد

اُمت میں ابوبکر کا ثانی نہیں کوئی جو پاس تھا سب کر دیا قربانِ محمد

ہر شخص کی گردن پہ ہے احسانِ محمد

ہر سمت نظر آتا ہے فیضانِ محمد

اسلام کی عظمت کو عمر نے ہے بڑھایا

ہر ملک میں پھیلا دیا فرمانِ محمد

عثمان نے ارشادِ نبی سامنے رکھا

سینچا ہے لہو دے کے جو بُستانِ محمد

حیدر کی شجاعت ہو کہ حمزہ کی شہادت دونوں میں نظر آئی ہمیں شانِ محمد

ہر شخص کی گردن پہ ہے احسانِ محمد

ہر سمت نظر آتا ہے فیضانِ محمد

کرتا ہے وہ اشعار میں بھی ذکرِ صحابہ

جو بھی ہے حقیقت میں ثنا خوانِ محمد

بڑھتی ہی رہی شانِ "وَرَفَعْنَا لَكَ ذِكْرَكْ"

اللہ کی رحمت ہے نگہبانِ محمد

اے میرے خدا تجھ سے یہ دانش کی دُعا ہے

چھوٹے نہ کبھی ہاتھ سے دامانِ محمد

ہر شخص کی گردن پہ ہے احسانِ محمد

ہر سمت نظر آتا ہے فیضانِ محمد

ہر شخص کی گردن پہ ہے احسانِ محمد